2Ch 19 | NdeIBE | STEP | UJehoshafathi inkosi yakoJuda wathi esebuyela eJerusalema esigodlweni sakhe ephephile,

2 Chronicles 19

1 UJehoshafathi inkosi yakoJuda wathi esebuyela eJerusalema esigodlweni sakhe ephephile, 2 uJehu umboni, indodana kaHanani, waphuma ukuba ayomhlangabeza wasesithi enkosini, “Kufanele yini ukuba uncedise ababi njalo uthande abamzondayo uJehova? Ngenxa yalokho, ulaka lukaJehova luphezu kwakho.

3 Kodwa-ke kukhona okuhle ngawe, ngoba uziqedile elizweni lonke izinsika zikankulunkulukazi u-Ashera, inhliziyo yakho wayimisela ukudinga uNkulunkulu.”

UJehoshafathi Ukhetha Abehluleli

4 UJehoshafathi wayehlala eJerusalema, waphuma wahambela abantu kusukela eBherisheba kusiya elizweni lamaqaqa lako-Efrayimi wabaphendula ukuba bamkhonze uJehova uNkulunkulu wabokhokho babo.

5 Wakhetha abehluleli elizweni, kuwo wonke amadolobho abiyelweyo akoJuda. 6 Wabatshela wathi: “Linanzelele elikwenzayo, ngoba kalehluleli umuntu kodwa lehlulela uJehova, yena uzalisiza ekwahluleleni. 7 Ngakho mesabeni uJehova linanzelele elikwenzayo, yahlulelani ngonanzelelo ngoba kuJehova uNkulunkulu wethu kakukho ukwehlulela kubi loba ubandlululo loba ukufumbathisana.”

8 Lakhona eJerusalema, uJehoshafathi wabeka abaLevi abathile labaphristi lezinhloko zezindlu zabako-Israyeli ukuba balawule umthetho kaJehova balamule lemibango. Babehlala eJerusalema. 9 Wabanika iziqondiso ezithi: “Kumele lethembeke ngokumesaba uJehova, ngobuqotho langenhliziyonye epheleleyo. 10 Wonke amacala eza kini evela ezihlotsheni zenu kuwo wonke amadolobho elihlala kiwo – loba kungamacala okuchitha igazi loba awokwephula umthetho, imilayo, izimiso loba iziqondiso – baxwayiseni ukuba bangoni kuJehova, funa ulaka lwakhe lwehlele phezu kwenu labafowenu. Lingenza lokho aliyikwenza isono.

11 “U-Amariya umphristi omkhulu nguye ozalikhangela emsebenzini wonke kaJehova uNkulunkulu, kuthi uZebhadiya indodana ka-Ishmayeli, umkhokheli wesizwe sakoJuda alikhokhele ezintweni eziqondane lenkosi, abaLevi labo bazakuba yizikhulu zenu. Yenzani ngesibindi, njalo sengathi uJehova angaba lalabo abazakwenza ngobuqotho.”